ရွှေကြက်ယက် ဆိပ်ကမ်းရှိ စက်သုံးဆီတင် သင်္ဘောများအား ဇန်န၀ါရီလ ၄ ရက်နေ့က တွေ့ရစဉ်
ဧရာဝတီမြစ်အတွင်း ရေဆိုးစွန့်ပစ်မှုများကြောင့် မြစ်ကြောင်းတစ်လျှောက်တွင် ရေထုညစ်ညမ်းမှုများကို ရေနည်းကာလများတွင် သိသိသာသာ ကြုံတွေ့လာရသည်ဟု မြစ်ကမ်းနံဘေး နေထိုင်သူများထံမှ စုံစမ်းသိရှိရသည်။
နွေရာသီ ရေနည်းကာလကို နိုဝင်ဘာလ ၁၅ ရက်မှ မေလ ၁၅ ရက်နေ့အထိ သတ်မှတ်ထားပြီး လက်ရှိမြစ်ကြောင်းအတွင်း ရေနည်းပါးစပြုလာချိန်၌ ရေဆိုးစွန့်ပစ်မှုများကြောင့် ရေချိုလျော့နည်းမှုနှင့် ရေထုညစ်ညမ်းမှုများ တစ်နှစ်ထက်တစ်နှစ် ပိုမိုကြုံတွေ့လာရခြင်း ဖြစ်သည်ဟု မြစ်ကမ်းနံဘေး ဒေသခံများက ဆိုပါသည်။
ဧရာဝတီ မြစ်ကမ်းနံဘေးတွင် နေထိုင်သူများမှာ မြစ်ကြောင်းအတွင်း ရေထုညစ်ညမ်းလာမှုအရ  မြစ်ရေကို ကျိုချက်သောက်သုံးနေရပြီး ထီးချိုင့်မြို့မှ ဒေသခံတစ်ဦးက "မြစ်ကမ်းဘေးမှာ တည်ဆောက်လုပ်ကိုင်နေတဲ့ ဂရိတ်ဝေါ သကြားစက်ကနေ စွန့်ပစ်ရေဆိုးတွေက ဧရာဝတီမြစ်ထဲကို စီးဆင်းနေတာပါ။ အဲဒီစက်ရုံရဲ့ ရေဆိုးစွန့်ပစ်စနစ်က ထွက်ရှိလာတဲ့ ရေဆိုးတွေကို အလျားပေ ၁၀၀၀၊ အနံပေ ၇၀၀ လောက်ရှိတဲ့ မလိုင်ချုံအင်းထဲမှာ စုဆောင်းထားပြီး ကြံရာသီချိန် အောက်တိုဘာကနေ ဇွန်လအထိ မြစ်ထဲကို စွန့်ပစ်တယ်။ ဒါကြောင့် ခုလိုရေနည်းကာလမှာ ရေထုညစ်ညမ်းမှုက ပိုမိုသိသိသာသာရှိလာပြီး ရေဆိုးစွန့်ထုတ်နေတဲ့အချိန်ဆို မြစ်ပြင်တစ်ခုလုံးမှာ အမည်းရောင် ပြင်ကြီးဖြစ်သွားတာပဲ" ဟု ဆိုသည်။
ထို့အတူ အမရပူရမြို့နယ်၊ ရွှေကြက်ယက်ဆိပ်ကမ်းတွင် အဓိကဆိုက်ကပ်ရပ်နားသော စက်သုံးဆီတင် ကုန်သင်္ဘောများ၏ ဆီယိုဖိတ် စီးဆင်းမှုကြောင့်လည်း မြစ်ကြောင်းအတွင်း ရေထုညစ်ညမ်းမှုများ ဖြစ်ပေါ်လျက်ရှိပြီး မော်တော်ဆလင်တစ်ဦးက "ရွှေကြက်ယက်ဆိပ်မှာ ရေနည်းကာလဆိုရင် သင်္ဘောဆိုက်ကပ်ဖို့အတွက် နေရာအခက်အခဲဖြစ်ရလို့ သင်္ဘောတွေကို ရေလယ်ခေါင်မှာ ကျောက်ချရပ်နားကြတာ များတယ်။ ဆိပ်ကမ်းမှာ နေရာအခက်အခဲ ရှိတာရယ်၊ သုံးရေအတွက် သန့်ရှင်းမှုမရှိတာရယ်ကြောင့်ပါ။ ရေလယ်မှာက စီးလာတဲ့ရေကို ကျိုချက်သုံးလို့ ရပါသေးတယ်။ ဆိပ်ကမ်းမှာက ဆီတွေ ယိုဖိတ်မှုများတာကြောင့် သန့်ရှင်းမှု မရှိတော့ဘူး" ဟု ဆိုပါသည်။
"ရွှေကြက်ယက်ဆိပ်က ဆီတင်သင်္ဘောတွေရဲ့ ဆီယိုဖိတ်လို့ ရေနည်းကာလဆို ရေက သန့်စင်မှု နည်းလာပါတယ်။ တင်ယူရရှိတဲ့ မြစ်ရေက သန့်စင်မှု မရှိတာရယ်ကြောင့် အရင်နှစ်တွေကဆိုရင် မြစ်ရေတင် စီမံကိန်းက ပေးဝေတဲ့ရေကို ကျိုချက်သောက်သုံးဖို့ အသိပေးတာမျိုး ရှိပါတယ်။ သိုလှောင်ကန်တွေထဲမှာ အနည်ကျစေအောင် နှစ်ညလောက် သိုလှောင်ပြီးမှ ဖြန့်ဝေတာမျိုး လုပ်ရတယ်။ ဒါပေမယ့် ရေတင်ယူရရှိမှု နည်းပါးလာတဲ့ အချိန်မျိုးဆိုရင်တော့ ရေပြတ်လပ်မှု မရှိအောင်ဘဲ ဆောင်ရွက်ရတာမျိုး ရှိတာပေါ့" ဟု စစ်ကိုင်းမြို့ရှိ မြစ်ရေတင်စီမံကိန်းမှ တာဝန်ရှိသူတစ်ဦးက ပြောကြားခဲ့သည်။